政情：IT豪受商台風波連累

商台賣出時段畀民主黨劉慧卿呼籲普選遊行，又接受民建聯贊助合辦深宵節目，搞到滿城風雨。本身係立法會資訊科技及廣播事務委員會副主席嘅民主黨李永達早前要求委員會加議程討論商台風波，點知委員會主席譚偉豪（IT豪）無端被牽連、翻舊帳，有IT界選民去信立法會，話IT豪曾經被指喺電視賣政治廣告，所以不適合主持討論商台風波嘅會議。

去信人黎焯東自稱獨立資訊保安研究員，佢同我哋講，IT豪○八年宣布參選立法會資訊科技界前，喺有線電視播一套名為《IT達人Talk》嘅宣傳短片，佢當時已向政府當局投訴IT豪賣政治廣告。佢笑言，踩進電子媒體政治廣告灰色地帶嘅「老祖宗」唔係劉慧卿或民建聯，而係IT豪，由IT豪主持相關會議係「自打嘴巴」喎。

IT豪尋日就平心靜氣話，黎焯東係好心提醒，佢會小心處理，先問秘書處同立法會法律顧問意見，若有需要，佢會讓畀李永達主持會議。不過，件事涉及李永達嘅黨友劉慧卿，由佢嚟做代主席都未必合適啫。