政情：立會世博團虛耗公帑
立法會世博團尋日繼續第三日行程，亦即係最後一日，佢哋搭夜機返港前，全力衝刺，一日參觀咗五個場館區，然後總結行程，不過唔知係唔係呢三日嚟行程太緊密消化唔切，佢哋總結嘅時候，冇講對高鐵嘅建造、香港高科技發展同大型展覽嘅操作等較宏觀嘅睇法，反而簡介喺唔同嘅展館，例如歐盟館、英國館同美國館見到啲乜。呢啲聽導賞員講就得啦，納稅人又使乜用公帑資助議員考察？
更抵死嘅係，行程結束前，立法會主席作總結，企喺旁邊嘅民主黨員李華明忽然貪靚，當眾整理自己嘅衣領，相當搶眼，喺佢後面嘅醫護界議員李國麟就發揮醫護人員嘅助人精神，向李華明伸出援手，兩個人喺直播嘅鏡頭面前，拉拉扯扯，關係曖曖昧昧。
如果從納稅人嘅角度睇，今次世博團嘅收穫實在冇乜，反而係各位議員喺展館區內大灑金錢買「戰利品」，同埋幾位無回鄉證嘅白鴿黨議員喺一次過回鄉通行證下發揮最大嘅自由度，最有滿足感。