中環耳目：Tim霍挺陸羽歎一盅兩件

香港食肆口味轉不停，舊式茶樓已所剩無幾，有逾七十年歷史嘅「陸羽茶室」，是滄海遺珠。已故全國政協副主席霍英東曾經係「陸羽」常客，估唔到佢位大公子霍震霆（Timothy）一樣鍾情「陸羽」，至愛點心係蝦餃同熱辣辣嘅叉燒包。

「陸羽」滿載香港情懷，Tim霍話，每逢有外國老友來港，都會帶對方去「陸羽」歎番一盅兩件，等佢哋一邊欣賞典雅古老裝潢，一邊感受傳統老派點心風味。Tim霍就醫肚至上，柯打叉燒包及蝦餃，回味無窮。

「陸羽」點心堅持用古法製作，材料新鮮。蝦餃皮用白飯曬乾磨粉搓皮來做，入口有淡淡米香；叉燒包看似平平無奇，原來燒製叉燒技巧極之講究，醬料更係關鍵，要調得啱啱好。叉燒包放上客人枱上，永遠是熱騰騰，一啖放入口，陣陣暖意在心頭。

Tim霍還講究茶香，心水茶葉係普洱。「陸羽」以一代茶聖「陸羽」命名，十分注重茶葉質素，由陳年普洱、鐵觀音、龍井到白牡丹一應俱全。Tim霍話，普洱茶味香濃，有助清腸胃，多飲都無妨。