中環出更（二）：楊敏德：創新由家長做起
有「紡織女王」之稱嘅行政會議成員楊敏德（Marjorie），由商界踩入政壇後，未見有大動作，尋日出席喺理大舉行嘅「創造性經濟論壇」，卻一鳴驚人。Marjorie妙語連珠，自嘲有「更年期善忘症」，又呼籲理大搞家長日，扭轉家長望子成龍嘅守舊心態，話創新由家長做起，Marjorie帶頭搞革命，喺台下嘅千金潘楚穎（Dee Dee）都拍爛手掌叫好。
千金甜笑支持媽咪
論壇請嚟多位財金猛人分享高見，前商務及經濟發展局局長馬時亨、財經事務及庫務局局長陳家強都係講者之一，口才了得嘅恒隆地產董事長陳啟宗（Ronnie）就擔任主持。
講經濟，身為理大校董會主席嘅Marjorie夠晒班，佢公司喺全球十個國家擁有逾五萬員工，又曾遠赴新疆設廠，大會叫佢就「蛻變中的中國經濟發展路向」發言，啱晒嘴形。Marjorie直言中國經濟起飛，但貧富懸殊嚴重，提醒老闆要有良心，賺錢之餘，要同曾經付出汗水嘅內地廉價勞工分享成果，畀員工更佳待遇。
Marjorie又關心香港年輕一代發展，慨嘆唔少人畀金融業嘅高薪利誘，搵工時一味向錢看，人生應該「Be Happy」，活得開心，佢話中國正值大時代轉變，機會多不勝數，後生仔應該去內地做嘢，豐富人生。講到呢度，其他嘉賓亦爭住發言。Marjorie細心聽其他人講嘢，冷不防主持Ronnie拋個新問題出嚟，問Marjorie企業應該點做至更有創意，Marjorie鬼馬地瞪大眼話：「我唔記得自己要講乜喇，呢個係更年期女人開會經常出現嘅問題。」引來哄堂大笑。千金Dee Dee全程喺台下用心聽，以甜笑眼神支持媽咪。
會上，Ronnie指中國發展無可避免湧現大堆難題，但有危亦有機，只要香港年輕一代敢於創新，將難題轉化成機會，不愁無發達機會。
卓妮追問Ronnie重金禮聘太古中國主席陳南祿過檔恒隆單嘢，Ronnie直認欣賞對方能力高。至於點解出咁高人工挖角，佢以老闆口脗話：「佢（陳南祿）之前幾高人工我唔知，恒隆係畀開呢個人工嘅。」Ronnie出手闊綽，卓妮都戥祿哥高興。Ronnie話祿哥七月十五日返新工，卓妮喺度預祝佢開工大吉！
卓妮