中環耳目：歐陸式華麗飯堂李鋈麟醒胃
位於銅鑼灣禮頓道同新會道交界嘅「飯堂」，雖然無開揚嘅大門布置，亦無大張旗鼓嘅宣傳，不過低調嘅作風，細緻嘅食物質素令佢成為名人新「飯堂」，包括識飲識食嘅前高官馬時亨同醫管局主席胡定旭。
推介新穎點心
「飯堂」雖然係食中式菜，不過佢哋嘅裝修布局就非常有歐陸色彩。身為老闆之一嘅東華三院總理李鋈麟話，單係裝修就用咗九百萬。「飯堂」用歐陸式嘅水晶燈配上舒適嘅梳化，雖然話「飯堂」有兩層，但佢哋嘅枱數唔多，樓下只有七張枱，樓上就係兩間包房，所以空間感十足。
講到食物，雖然係食中式酒樓菜，但味道就較傳統菜式清新，依家加入好多亞洲地方菜嘅元素，好似今次李總理介紹嘅餈飯同餃子就係一例。餈飯係上海主食，「飯堂」將傳統餈飯煎到金黃色，外面脆卜卜，但係咬落去就軟綿綿，焦香加埋蝦米香味，相當醒胃。
至於由日本福岡餃子取得靈感嘅煎餃子，棄用日式傳統蒜泥做餡料，改用白菜同豬肉。李總理話呢度叫「飯堂」，意思就係要做大家嘅「飯堂」，所以食材一定係新鮮同無味精，即使呢類煎炸食物，佢哋用嘅油都只係用一次。當然，「飯堂」搞得有聲有色，負責諗出呢兩款點心嘅總經理玲姐（譚綺玲）功不可沒！
卓妮