中環出更：許曉暉愛珍珠自然清雅
珍珠清雅脫俗，係女人其中一個好朋友。唔講唔知，原來民政事務局副局長許曉暉（Florence）同立法會議員梁美芬，都一樣同珍珠做咗best friend，無獨有偶鍾意佢夠天然，不過前者係媽咪介紹，後者就係自己行街發掘嘅。
「珍珠芬」愈買愈豪
今個月中結婚十周年嘅Florence，早幾日出席工聯會活動，咁啱戴住媽咪送嘅陪嫁珍珠，個心口針仲係媽咪割愛嘅添，所以別具意義，難怪佢話全部都係佢嘅無價寶。Florence鍾意珍珠自然清雅，配襯行政套裝大方得嚟又夠簡單，相當好襯。
梁美芬鍾情於金係人都知，原來珍珠佢一樣啱。佢話以前喺中大讀法律，成日去沙田行街，最鍾意行日本潮服店，亦喺嗰度邂逅珍珠，但嗰時做補習半工讀無乜零用錢，只可以買平平哋嘅養珠。
不過隨住收入增加，可以愈買愈豪，依家最愛去又一城嘅World Jewelry，嗰日見佢戴緊嘅都係3、4萬一粒嘅南洋珠。佢仲講笑話，大家以後可以改口叫佢「珍珠芬」，唔使淨係叫佢「鼠王芬」咁悶。
卓妮