政情：何百里撞穿頭專心畫畫
九龍華仁書院出名盛產政商界名人，但其實佢哋學生嘅藝術水平亦一啲都唔失禮。尋日佢哋就喺尖沙咀文化中心搞咗個八十五周年校慶藝術展，向市民展出歷屆校友嘅得意之作。國際知名嘅水墨畫大師何百里身為華仁仔，當然有到場支持，不過唔講唔知，原來佢當初決定踏上藝術家之路，完全係因為一個「頂頭槌」！
何百里同我哋講，佢細個除咗畫畫叻，運動都有一手，仲做過足球隊隊長添。不過有一次佢踢波「頂頭槌」，一嘢就撞落道龍門度，頭破血流，搞到佢爸爸非常痛心，自此勸佢專心喺藝術方面發展。何百里笑言：「如果唔係嗰個『頂頭槌』，可能我都唔會咁專注畫畫！」
何百里尋日撞番啲校友，好多都淨係記得佢係運動健將。而佢就大讚母校嘅校園勝在夠大，周圍都種晒花草樹木，令佢讀書時有好多機會去了解同觀察大自然，從中得到唔少藝術靈感。