政情：啟山爆媽咪晶晶感情好
港協暨奧委會會長霍震霆嘅大公子霍啟剛，同「跳水公主」郭晶晶嘅婚期一直只聞樓梯響，霍家上下對此亦三緘其口，耐不耐先好似唧牙膏咁露少少口風。身兼香港小型足球總會會長嘅霍家二公子霍啟山，尋日出席一個世界盃活動開球禮時，又被追問阿哥啟剛嘅婚期，雖然啟山不斷幫阿哥擋駕，但仍然漏咗口風，話媽咪朱玲玲同晶晶感情要好。
啟山被問及會否聯同啟剛及「未來阿嫂」郭晶晶去南非睇世界盃賽事，啟山就好醒目話：「阿哥都好少睇波嘅！」但有傳聞話佢哋好快會結婚喎？今年係咪有結婚好消息？啟山就答話：「傳咗好耐啦！到時大家就知啦！」又問佢媽咪朱玲玲係咪對啟剛婚事好心急？佢話：「唔係心急，大家感情好啫！」原來朱玲玲同晶晶感情咁好，所以關心呢頭婚事，唔知幾時先至飲到杯新抱茶呢？