政情：大輝拉頭馬沙田隊降班
廠商會立法會議員林大輝近半年來馬運亨通，其愛駒「確奇妙」及「極奇妙」頻頻贏馬，特別係「極奇妙」，今年元旦日奪冠後，尋日勞動節又再爆冷勝出，為大輝贏得一百七十萬元獎金，真係豬籠入水。不過，大輝馬場得意，隨即傳來波場壞消息，尋日本地甲組足球聯賽中，流浪與和富大埔打成平手，間接宣布現時排喺榜尾、大輝艱苦經營嘅沙田足球隊提早降班。
馬場得意 球場失意
大輝嘅愛駒尋日四點出賽，但佢兩點鐘就現身沙田馬場，為朋友匹「多奇妙」打氣。馬名又係叫「奇妙」，莫非大輝有份？原來背後有段古。話說七十年代讀緊中二嘅少年大輝去做暑期工，結識其中一個老闆劉志傑，雖然大家年紀差一截，但竟然發展出一段深厚友誼，其後劉志傑榮升馬主，都特登搵大輝幫佢改馬名，結果大輝就以自己嘅「奇妙」喜好改為「多奇妙」。
原本大輝一心諗住捧老友場，點知「多奇妙」三甲不入，反而佢自己匹「極奇妙」爆冷跑出，除贏得一百七十萬元獎金外，最開心係可以親身同媽媽、老婆一齊拉頭馬，但想唔到短短一小時後，就傳來自己領班嘅沙田足球隊提早降班嘅壞消息。有人話馬匹好有靈性，莫非「極奇妙」有預感知道主人將會波場失意，所以跑快幾步爭番啖氣？