政情：張宇人輸心情贏選票

不過根據自由黨消息，今次事件難免對自由黨進軍直選之路構成一定影響，但喺鞏固功能組別戰場方面，就係賺多賠少，飲食界內暗中表示撐Tommy嘅選民大幅上升，變相為二○一二年立法會選舉提早箍票，令佢爭取連任更加硬淨。

自由黨○八年立法會選舉受挫後，堅持唔會放棄直選路，不過喺銳意強化地區實力背後，自由黨現時手握嗰三個功能組別議席，亦面對被狙擊嘅危機，來自傳統左派嘅裕華國貨董事副總經理余鵬春，據聞好大機會會出戰批發及零售界挑戰方剛，經濟動力又盛傳諗緊搵已退出自由黨嘅物流商會主席羅煌楓，出戰航運交通界硬撼劉健儀。

反而飲食界至今未見有具威脅性嘅對手，尤其經過近期嘅最低工資爭論後，Tommy喺界內嘅票源更加穩健。

張宇人喺《城市論壇》講完最低工資後，有「茶餐廳老闆鄺先生」打電話上電台抨擊佢，新鴻基地產非執董郭炳湘又公開同佢劃清界線，指喺新地旗下香港世界貿易中心會做副總經理嘅Tommy，唔代表新地立場，一時間Tommy好似陷入孤立無援之境。但據了解，Tommy自己嘅親身體會卻係另一回事。

鞏固票源 滋味在心頭

消息指，Tommy經歷「廿蚊論」風波後，一路畀開廿蚊一個鐘畀伙記嘅茶餐廳老闆，固然舉腳力撐Tommy。就連其他畀開廿四、廿五蚊嘅食肆連鎖店老細，都私下同Tommy講多謝，話以前班伙記對收呢份糧無乜特別感覺，聽完「廿蚊論」之後，就當堂覺得自己已算唔錯，人心安定。所以呢班老闆都喺心裏暗撐Tommy，只係礙於群情洶湧，無人夠膽企出嚟明撐。

飲食界唔肯明撐自己，Tommy亦非常理解，最重要係喺二○一二年換屆選舉投票當日，實實際際透過選票向佢表達支持。不過任何人畀人鬧咗成個月，點都無辦法笑得出，據聞佢心情都低落咗好一陣子。呢次Tommy贏了選票、輸了心情，計落划算與否，真係見仁見智。