中環出更：方劉小梅黃星華歎星級意菜
食肆想揚威，最緊要「摘星」。數全球最快摘下米芝蓮一粒星嘅食肆，原來近在咫尺，就係位於銅鑼灣伊榮街嘅星級意菜「The Drawing Room」。呢日中大校董兼香港中華基金會主席方劉小梅（Helen），約埋前房屋局局長黃星華（星爺）嚟開餐，解開摘星之謎。
The Drawing Room名氣響噹噹，今次老闆之一嘅鄭相賢（Tony）仲親自出馬招待，原來Tony媽咪同Helen係世交，Auntie駕到，Tony精心預備鎮店之寶「西班牙紅蝦意粉」款客。Tony話呢款紅蝦產自深海，屬蝦中極品，五、六月品嘗特別肥美，蝦肉咬落爽口鮮甜。蝦汁另有用武之地，用嚟煮扁意粉，等鮮蝦精華滲透每條意粉。
開業七月摘米芝蓮星
Helen笑言本來怕食腥味海鮮，點知試過紅蝦意粉後清晒碟，大讚只有廿八歲嘅Tony廚藝了得。「星爺」黃星華都豎起大拇指，讚意粉醬汁濃淡適宜，交出水準。得到咁多人讚賞，怪唔得The Drawing Room開業僅七個幾月，就摘下米芝蓮一粒星，高官、名人都慕名一試啦。
老闆鄭相賢出身名門
卓妮八到，餐廳背後仲有傳奇色彩，原來老闆Tony出身名門，三叔公就係捷和集團創辦人、鋼鐵大王鄭翼之，著名時裝設計師鄭兆良就係佢堂兄。生於富裕之家，Tony為追尋夢想，放棄投資銀行高薪厚職，匿埋又熱又焗嘅廚房當大廚。
Tony當年留學倫敦修讀經濟時，已花費三十萬元喺名牌餐飲學院 Le Cordon Bleu學烹飪。畢業後雖曾投身金融界，卻念念不忘美食，最後更辭工跑去羅馬一間米芝蓮二星餐廳當大廚助理。去年Tony自己創業，與「Aspasia」行政總廚Roland Schuller夾檔開The Drawing Room，一鳴驚人。
卓妮