政情：葉偉明搶攻新東露底
工聯會自去年改選領導層後，積極研究擴充直選「版圖」，仲計劃派出勞工界立法會議員葉偉明下屆轉戰新界東。其實葉偉明想出戰新東打真軍已經係司馬昭之心，佢年初喺大埔開咗首個議員辦事處後，佢嘅橫額亦喺新東掛通街，近期仲擺明車馬同兄弟黨民建聯嘅新東立法會議員陳克勤爭出位添。
話說雪佛龍計劃陸續終止加德士在港嘅家用石油氣服務，全港有十幾個屋邨或屋苑受影響，最快半年後陸續「斷氣」，當中唔少屋邨或屋苑位於新東。民建聯陳克勤作為新東議員，打頭陣向政府提出書面質詢跟進事件，殊不知做開勞工事務嘅葉偉明竟然撈過界，同樣提書面質詢，要求政府詳細交代應對方案，又質問政府有冇就本港能源供應情況進行研究等。
其實工聯會要推葉偉明走直選路已早有所聞，依家一條書面質詢更令佢露晒底，就連同氣連枝嘅民建聯一樣冇面畀，擺明要同陳克勤爭出位，收買新東街坊嘅歡心。