政情：青海氧氣罩大輝開眼界
青海玉樹縣發生七點一級地震，牽動港人善心，廠商會代表林大輝上星期更加即刻打長途電話上青海，事關佢喺當地興建咗五間小學，擔心師生安全，好彩打探之後，知道小學所在地距離震央最近都有七百幾公里，五間小學絲毫無損，可算不幸中之大幸！
視察學校地點體會多
身兼河南省政協常委嘅大輝，喺河南有十八間「飛揚小學」，近兩年開始發展至青海，五間小學用番「飛揚」嘅品牌，寓意透過知識脫貧，一飛沖天。大輝話，青海風景如畫，可惜地區貧瘠，夏天極度乾燥，冬天更加令人苦寒難耐，香港人一般好難適應。佢最初親自上青海視察學校地點時，就領教唔少，有一件事仲令佢眼界大開添。
大輝憶述話，佢兩年前第一次同女助理上青海，女助理患上高山症，當地人於是搵嚟一個氧氣罩畀佢吸，但大輝同女助理一攞上手，發現氧氣罩嘅罩邊「綑晒邊」，未使吸氧，見到嗰一撻撻陳年污漬，成個人已經醒晒，心怕吸咗落肚，反而無事都變有事，於是女助理最後寧願返酒店大覺瞓，都唔敢嘗試吸氧治療。大輝話，一直知青海貧瘠，但嗰次真係大開眼界！