政情：世博港展區甩轆唐唐瘀爆
上海世界博覽會下月一日正式開幕，象徵香港嘅香港館籌建工作亦如箭在弦，政務司司長唐英年尋日親身到上海巡視展館，仲係威係勢歡迎傳媒採訪，點知巡到香港都有份參展嘅「城市最佳實踐區」時，竟然發生甩轆場面。唐唐示範智能卡技術裝置時，透過觸控式螢幕選擇語言，點知毫無反應，立即尷尬得手足無措，仲要自暴其短爆肚話：「這個好像要修理！」唐唐當堂出醜，仲要令香港丟架，負責嘅部門官員認真難辭其咎。
香港為參加今次上海世博，大拿拿用咗三億四千六百萬港元籌辦整項活動，其中一億四千五百萬元用以設計及興建香港館，其餘二億元就用作營運同舉辦今次甩轆嘅「城市最佳實踐區」展覽。發到咁大嚟搞，用意都係推銷香港，可惜唐唐誤踩蕉皮，瘀爆！邊個要孭起隻鑊呢？
睇番資料，整項活動都係由政制及內地事務局全權負責，自然要算到局長林D9頭上。我哋尋日打去問政制局點解會咁失策甩轆，政制局話搵相關部門同事回覆，無耐我哋就收到商務及經濟發展局來電，原來實踐區係該局負責，所以局長劉吳惠蘭（Rita）要為今次甩轆事件孭鑊。Rita搞經濟發展，但搞個展館都甩轆，唔怪得咁多人話上海會後來居上超前香港啦！
林D9甩身 劉吳惠蘭孭鑊
唐唐巡視香港館後硬着頭皮接受傳媒訪問，被問及展館大出洋相，唐唐強顏歡笑話：「一定要改善啦！因為我哋預咗將會有好多人嚟參觀嘅，除咗繁體、簡體外，仲有好多其他語言，所以要保障人流暢通，一切運作都要正常，要做到最好囉！」唐唐飭令在場官員話，要喺五日試運期內盡力改善，仲話已發出邀請，希望國家領導人到香港館參觀添！
林D9成功甩身真係一額汗，事關該局轄下嘅駐京辦去年籌辦十‧一花車巡遊時，已被建制派中人批評香港架花車似「紙紮」花車，顏色又淡，基本上衰過紙紮，當時佢拍心口寫包單話要搞好今次個香港館，點知劉吳惠蘭嘅麾下唔生性，搞到唐唐出醜，丟晒香港嘅架！