中環出更：威靈頓英中有高官校友
名人圈中不乏同門師兄弟。平等機會委員會主席林煥光（WK）同前郵政署長譚榮邦，原來都係威靈頓英文中學校友。「威記」校風曾惹人關注，譚榮邦自嘲讀飛仔學校出身，當年見家長多過食飯；WK就為「威記」平反，話校風喺六十年代相當唔錯喎。
快活谷馬場前日有賽事，譚榮邦匹團體馬「勝任有餘」勝出，連同特別獎金在內，合共捧走六十五萬幾。匹馬原來係團體馬，除咗譚榮邦之外，商務及經濟發展局局長劉吳惠蘭、公務員事務局局長俞宗怡、前財經事務及庫務局常秘何鑄明都有夾分。
拉頭馬陣營中，卓妮仲見到WK兩公婆。原來WK同譚榮邦係師兄弟，譚榮邦高班啲，就讀「威記」分校；WK就畢業於中環卑利街「威記」正校。讀書年代，兩人未相識，入到官場後反而一見如故，並成為好友。
WK：絕對唔係飛仔學校
「威記」已成香港歷史，九龍灣最後一間校舍亦喺○一年結束，WK話唔捨得，因為當年校譽的確唔錯，絕對唔係飛仔學校。譚榮邦就大爆中學時代懶讀書，幾乎年年見家長，中四嗰年突然醒覺，擔心會考一旦肥佬，前途就係咁先，於是發憤讀書。後來居上嘅佢後勁凌厲，結果入咗聖士提反書院呢間港島出名嘅女校做男生，後來考入港大、仲做埋政務官添。「威記」出咗呢兩位高官，都算有交代嘞。
講開又講，卓妮前日見WK同太太袁轉好拍住拖去馬場，WK連落樓梯都搭住太太嘅膊頭，好不恩愛。記得當年WK因為傳緋聞而辭去特首辦主任；依家佢重返政壇，同太太又重修舊好，睇嚟一切已雨過天青。
前日馬場仲有另一位稀客，就係退役「體操王子」李寧，佢罕有地帶埋太太入場。李寧一向熱心公益，講起青海災情，佢話名下有個慈善基金，嚟緊會做番啲嘢幫吓手。
卓妮