中環出更：象哥遊米蘭特賣場尋寶
有航空公司近日推出直飛米蘭航線，城中掀起一片米蘭熱，一眾立法會議員及行政會議成員早前趁住復活節假，拉隊「朝聖」。此行筍到極，由國泰航空包晒機票同食宿，立法會議員黃定光（象哥）執到寶，喺米蘭特賣場狂掃西裝同冷衫，但李慧琼（Starry）就無咁好彩，喺機上失眠，美女變「熊貓」，真陰功。
呢個米蘭尊貴團共有五十人，立法會議員李華明、陳鑑林、謝偉俊，行會成員查史美倫、鄭耀棠；運輸及房屋局副局長邱誠武等人都有份。
直飛米蘭只花十三粒鐘，一行人喺三月三十一日凌晨零時四十五分起飛，一覺瞓醒，啱啱好係米蘭時間朝早八點幾。咁嘅安排本來fit到極，可惜Starry成晚眼光光，落機後隨即展開連串參觀活動，踩到夜晚十一點半先返房，難怪Starry話，咁大個女未試過咁長時間唔瞓覺。
相反，象哥就喺機上倒頭大睡，叉足電。梗係喇，象哥有重任在身，要做「購物大使」，落機後一有空檔就橫掃LV、Miu Miu同Chanel，購入多個春夏季新款手袋送畀太太同囡囡。使咗幾多錢？象哥話係秘密，總之就大出血喎。象哥闊佬家人但慳自己，轉去米蘭特賣場尋寶，買到三套Hugo Boss西裝同三件冷衫，埋單唔使四千五百港銀，平到笑。象哥有感而發，話香港應該大搞名牌特賣場喎。
橄欖欣賞老外醒獅
同行嘅李華明就鍾意睇風景，大會安排欣賞米蘭湖景區，但落起雨來，大殺風景。陳鑑林（橄欖）就欣賞米蘭人熱情好客，話說大會喺當地安排一個首航儀式，請嚟醒獅表演，橄欖上前八卦吓，原來呢隊龍虎舞獅隊全是老外，廿年前去北京拜師學藝，咁好學，橄欖都要寫個服字。
卓妮