順天邨水壓弱30年無改善

鄺氏夫婦於去年六月獲房署編配入住順天邨天衡樓頂樓單位，接着便四出張羅新居所需，包括購置全新煤氣熱水爐，未料竟得物無所用，「煤氣公司話我住頂樓，水壓唔夠，根本冇辦法裝到個煤氣爐！」新爐無法安裝，水流緩慢亦引發其他問題，如每次開動洗衣機便須「等成粒鐘」才能注滿足夠水量啟動洗衣系統。

生活大受影響的鄺太多次向房署投訴，每次俱無功而還，「啲職員淨係話會有工程加大個水壓，但係唔知幾時搞掂，到依家我哋都仲未裝到熱水爐，日日要煲水沖涼，真係好麻煩！」鄺太獲悉同層不少鄰居因水壓問題經年未獲解決，終在迫不得已下改裝電熱水爐以解決問題。

忍無可忍 自資萬元加泵

「我哋好多年之前都投訴過，一直冇人理，幾年前終於忍無可忍，用咗萬幾蚊自己加個電水泵同兩條大喉，咁先可以用到煤氣熱水爐咋！」同樣家住在天衡樓頂樓的陳女士坦言亦對水壓不足問題「忍足」廿多年，最終亦須自行尋求解決方法。

當區區議員郭必錚踢爆區內水壓不足問題並非始於今時，對房署一直拒絕正視問題表示深感無奈，「條邨入咗伙成三十年，水壓就搞足三十年都未搞掂，十九年前啲居民已經嘈得好緊要，房署仲懶懶閒話『係咁㗎嘞』，結果就搞到今時今日！」

陳女士自費萬多元加裝電水泵（紅圈示）及水喉（箭嘴示），才能安裝煤氣熱水爐。

為加速洗衣機儲水時間，鄺太會以水煲協助加水。

不認錯又補鑊 房署自摑

中華煤氣有限公司發言人表示，早前曾進行檢查，證實順天邨天衡樓頂層單位水壓不足，部分型號熱水爐並不適宜安裝。

房署發言人則承認，一般位處頂層單位的水壓會相對較弱，但經過測試之後，發現鄺氏的單位符合房署標準。另外，為配合時代需要，房署工程組已於去年一月開始籌備在天衡樓天台興建加壓泵房，提升水壓標準，有關工程已於日前完成。

公屋聯會主席王坤形容房署的做法「不可思議」，「煤氣同食水都係基本設施，房署竟然搞幾十年先整好個水泵，真係好離譜！」王批評房署近年致力提升客戶服務，可惜一直未見成效，「投訴咗咁多年，房署先改善，呢啲究竟係咩客戶服務？」

記者 梁少儀