有「傻強」之稱嘅財經事務及庫務局局長陳家強又有偉論，今次唔係講金融風暴，亦唔係講金融海嘯，而係講人民幣匯率，講通脹，信唔信由你，但信者冇得救。
話說近排人民幣匯率問題炒到合合，美國財長蓋特納特登飛去北京傾呢單嘢。人民幣會唔會升值、幾時升值，全世界都到實。無他嘅，「人仔」一升，好多嘢水漲船高，香港首當其衝，更加避無可避，如果唔未雨綢繆，分分鐘又要搞到雞毛鴨血。
陳家強尋日話喎，由於投資者憧憬人民幣升值，近期好多熱錢流入香港，當局會密切留意對本港資產市場同整體經濟嘅影響。喂！身為財金高官，實個市係職責所在，咁嘅回應好行貨啫。當被問及人民幣升值會唔會加速通脹及形成資產泡沫時，傻強話「言之尚早」喎。
唔係啩？咁嘅說話，居然出自主管財經嘅問責局長把口，市民信佢咪大鑊？正所謂，為政不在多言，高官講嘢唔經大腦亂咁噏，失禮街坊事小，連累市民事大。
聽傻強咁噏，仲以為佢生活喺月球，唔食人間煙火添。講真，通脹嚴唔嚴重，問呢班坐享高薪厚祿嘅高官盞嘥氣，市民就最有發言權。嗱，油公司啱啱又宣布加價喇。就算無車一族，都逃唔過一片加風，呢，新學年未到，已經有超過一成直資學校打算申請加學費，有啲加幅仲去到五成添。即使唔揸車，又冇子女，一樣冇好日子過，呢嗱，私家醫生診金近年已經靜靜雞加咗一成，問你點頂。
冇錯，本港二月份消費物價指數上升百分之二點八，齋睇數字唔算好高，弊在本港實質平均工資不升反跌，呢樣加啲，嗰樣加啲，唯獨人工冇得加，呢條數唔使市民教，財金高官都知點計嘞啩？
本港生活必需品絕大部分靠內地供應，「人仔」稍微升值，柴米油鹽、肉類蔬菜即刻加價，低下階層市民生活即時受影響。最慘嘅就係，人民幣升值吵咗咁耐，市場早有預期，好多商戶已經事先加定價喇，仲等你傻強打鑼通知咩！呢，家陣去飲餐茶，好多酒樓茶錢都加咗一蚊，試問呢啲唔係通脹又係乜呀？
通脹數字唔高，但物價漲完又漲，尤其係生活必需品幾乎無一幸免，當局居然仲懵吓懵吓，唔係做好防範，反而扮先知，話通脹「言之尚早」，傻強呢鋪分明又係靠害喇。嗱，前年歐美金融市場風聲鶴唳，呢位財經事務及庫務局局長居然話，完全睇唔到金融風暴重現嘅迹象。結果，係就係唔見金融風暴，至弊嚟咗場比金融風暴勁好多嘅金融海嘯，打到香港殘晒呢。
計功夫茶話齋，做官最緊要謹言慎行，為咗市民着想，傻強最好快啲收聲，唔好噏得出就噏，再靠害市民喇。