政情：發叔北上打波有「艷遇」
神州大地靚女多，經常往返內地嘅政界人士真係要格外留神，因為畀人影咗相真係水洗都唔清，好似鄉議局主席劉皇發都遇過一單霧水情緣，好彩有驚無險。話說發叔同班老友到內地打十日高爾夫球，輕鬆到連鬚都懶得剃，打到第八日攰攰哋，就拉大隊去足浴館做腳底按摩。發叔諗住滿臉鬍鬚無人認得啦，點知畀足浴館個老闆娘一眼認出，仲好似蜘蛛精遇見唐三藏咁，眼甘甘望實發叔。
發叔跑江湖見慣世面，當時運高睇唔到就算，繼續享受腳底按摩樂趣，點知按按吓，老闆娘有所行動，行埋去話認得發叔就係劉皇發，仲拉住發叔話合照，想掛張相喺舖頭做生招牌，嚇到發叔即時縮腳彈起身。發叔話，好彩當時仲有其他人喺度，否則畀人影咗張相有所誤會，就真係水洗唔清。不過，發叔好自信咁話，絕對唔擔心會畀發嬸扭耳仔，因為發嬸係個明白事理嘅賢內助喎。
從另一個角度睇，返到內地做腳底按摩都有人認得，證明發叔真係好有江湖地位。