政情：蔡志明預人仔今年升值
全城熱講人民幣升值話題，熱錢偷步湧入香港搶購人仔，估計部分行業會因為人仔升值而受惠，但對於喺內地設廠嘅港商，就未必係好事。玩具大王蔡志明就預計人仔今年會升值百分之三至四，令內地人工等營運成本上升，利潤變相縮減咗，衝擊絕對唔細。
蔡志明日前出席保良局就職晚宴時，對人仔升值大表關注。佢話自己喺內地設廠多年，每月單係出糧就要動用數千萬元人民幣，人仔升值等同人工開支大咗，但成本上漲又無法轉嫁畀客戶，利潤變相唔見一截。
想減低人仔升值帶來嘅損失，就要識得走位同預早做定風險管理。蔡志明教路話，投資內地物業係唔錯嘅選擇，既可收租，又可享受物業升值帶來嘅回報，佢自己亦先後喺深圳及上海等地掃咗唔少物業。對於有人選擇投資擁有大量人民幣資產嘅中資股票，佢就唔建議嘞，因為股市上落波幅大，買樓收租穩陣啲喎。