政情：評港政客演說 傻強傻笑
外號「傻強」嘅財經事務及庫務局局長陳家強尋日出席一項英語演講比賽頒獎禮時指出，無論係喺香港定外國，好多政客一落咗台過咗氣，啲民眾好快就會唔記得佢哋做過啲乜嘢，但係佢哋發表過嘅精彩政治演講，反而好多年之後都仲記憶猶新。
傻強以美國為例子，遠嘅有已故黑人民權領袖馬丁‧路德金嘅「我有一個夢」演說，近嘅就有現任總統奧巴馬，佢喺競選時同上任後嘅幾篇演說亦都好出色，內地亦有個別領導人成日出口成文，講乜都咁動聽。
不過傻強並冇提到任何現任或前任本地政客。頒獎禮結束後，我哋問佢香港有邊啲政客講英文演詞講得好，佢就淨係答咗一句「哈哈哈」。咁又好難怪佢嘅，本港政客嘅知名言論，十居其九都係衰嘢，例如「我要做好呢份工」、「吊吊fing」、「玩鋪勁」、「民望如浮雲」、以及最近嘅「廿蚊論」等，想遺臭萬年就可以，流芳百世肯定冇佢哋份，一時三刻真係好難記到有乜又正面又扣人心弦嘅政治演說。