政情：萬元世博團大輝話唔貴
早前內地當局計劃安排立法會議員喺補選前嘅周末參觀世博，已經有唔少泛民議員不滿佢哋有意為補選降溫，計劃杯葛，點知前日世博團嘅詳情出爐後，就連建制派議員都畀佢過萬蚊嘅團費嚇到有意縮沙。不過廠商會代表林大輝就力撐呢個和諧世博團，話過萬蚊嘅團費一啲都唔貴，仲話自己一定會去添！
「冇理由日日食快餐架」
大輝尋日同我哋講，上海嘅酒店一晚郁吓都要千零二千蚊，連埋機票同車費，萬幾蚊嘅團費算係好合理，仲反問：「你上到去都冇理由日日食快餐架？」佢強調呢個係百年難得嘅機會，自己一定會去。
另外，大輝匹愛駒「極奇妙」，原定喺早個月孖住馬王「蓮華生輝」齊齊出戰日本，點知「蓮華生輝」臨上機前先嚟絞腸痧，最後「極奇妙」都冇去到。尋日「極奇妙」久休復出，但係就竟然跑包尾，令人大跌眼鏡。大輝事後解釋，「極奇妙」從來都冇跑過濕地，應該都係尋日嘅微雨令佢失威啫，唔係因為佢有咩病痛喎。