政情：袋巾傑再選特首 白鴿黨拒抬轎

下屆特首選舉將於二○一二年舉行，如果袋巾傑要再參選，明年就要開始與泛民商討參選問題，夾計爭奪最多嘅特首選舉委員會議席。上次袋巾傑獲得嘅一百一十多張選委提名票中，保守估計白鴿黨最少有三十票，起咗關鍵性作用，所以袋巾傑要再入場，就一定要問過白鴿黨先，而且一票都不能少。我哋收到風，白鴿黨核心經過初步討論後，似乎唔多想再撐袋巾傑。

賽後檢討 賠了夫人又折兵

正所謂「冰封三尺，非一日之寒」，當初泛民力撐袋巾傑選特首，都係想喺競選過程中迫使煲呔曾為港人作出某啲政策承諾，包括最令泛民振奮嘅為普選「玩鋪勁」。可惜煲呔曾當選後立即反口覆舌，「玩鋪勁」呢三個字，就好似當年嘅「八萬五」房屋政策咁，無聲無息咁消失咗。唔少白鴿黨中人作賽後檢討，都覺得袋巾傑參選其實成效不大，仲白白幫咗袋巾傑同佢所屬嘅公民黨抬轎，賠了夫人又折兵。

白鴿黨近年另一個重要變化，就係加入咗一直死硬反對小圈子選舉嘅劉慧卿做副主席，佢講過如果個黨嘅立場同佢有原則性衝突，不排除會退黨唔玩，加上佢出名夠惡，肯定會對白鴿黨嘅參選特首同選委會立場造成一定影響。

不過亦有人分析，真正嘅致命傷同導火線其實係「五區公投」，話公民黨同社民連聯手發動「公投」，不但事前冇同白鴿黨認真傾過，事後仲對決定唔玩「公投」嘅白鴿黨大肆批鬥，話佢哋係民主叛徒，令該黨喺泛民陣營裏外不是人。雖然早前都有白鴿黨人落九龍東幫參加立法會補選嘅袋巾傑拉票，但要佢哋撐埋下屆特首選舉，機會就相當微囉！報咗名參加九龍東補選嘅仲有黎敬輝同杜森。