中環出更：黃錦成打書釘乜都睇
九龍錶行董事總經理黃錦成收藏好多名錶，生活品味唔使多講，原來佢都好有書卷味，一星期總有兩、三日到書局打書釘。
卓妮早前喺旺角豉油街嘅商務印書館，見到黃錦成喺陳列管理書籍嘅大書櫃前仔細搜尋，好專心咁逐本書拎起揭吓、睇吓，最後揀咗《策略學》同埋《部下指導術》兩本書。
黃錦成同卓妮講，佢最近迷上研究中國現代史，所以經常落嚟書局搵新書。
當日佢喺歷史書度冇收穫，但係就買咗兩本有關管理學嘅書，自己睇完之後仲會傳畀公司啲中層主管睇，等佢哋充實吓管理知識。
黃錦成話書店有好多知識寶藏，好似設計方面嘅書都係佢嘅至愛。事關佢有自己品牌嘅手錶，經常要注入新設計元素，所以會睇吓有關書籍搵設計靈感。
新設計助司機睇時間
佢舉例話，司機揸緊車時通常睇唔到腕錶嘅時間，但佢哋已經諗到個新設計去解決呢個問題，現時正辦緊註冊手續。卓妮覺得好得意想問多啲，佢就賣關子話日後先再公布啦！
卓妮