中環出更：假的周永健真的贏頭馬
所謂同姓三分親，但同名同姓就可能惹來誤會。早前有匹馬「星火燎原」喺夜賽勝出，馬主係周永健，但當晚就唔見馬會大董周永健（Anthony）去拉頭馬，莫非Anthony要抖足精神翌日到教育學院接受頒發榮譽院士？Anthony話大家搞錯晒喇，其實香港係有兩個馬主「周永健」，佢仲好幽默咁話自己係「假周永健」，當晚贏馬嗰個周永健先至係真身喎！
其實Anthony早已同「星火燎原」馬主周永健相認，所以絕對唔會拉錯頭馬咁離譜，但外人唔知就經常搞錯，尤其係對方拉頭馬時，好多朋友都去恭喜佢，但被人恭喜都唔會介意嘅。Anthony就提供一個方法畀大家來分辨真假「周永健」，就係睇英文名嘞，「真周永健」叫Winston，大家睇到英文名就自然會識分啦！
囝囝報喜 半信半疑
雖然Anthony話自己係「假周永健」，但真的假不了，況且贏馬無分真假，點解？Anthony匹愛駒「偉感」自○九年底出賽以來一直未有贏過，尋日出賽終於守得雲開，以一個馬鼻險勝。不過，Anthony尋日啱啱遠赴上海公幹，無緣親身到場拉頭馬，由太太胡慕芳同兒子周郭善（Justin）做代表。
Justin現時喺英國倫敦大學攻讀法律系，呢兩個星期放復活節假回港，於是就陪媽媽入馬場為爸爸嘅愛駒打氣，仲投注咗一百元獨贏支持吓。起初周家上下都對愛駒信心不大，但Justin腳頭好，愛駒愈戰愈勇，喺衝線勝出一刻，兩母子振臂歡呼。Justin隨即致電爸爸報喜，點知「假周永健」仲半信半疑咁反問：「係咪真㗎！」愛駒帶挈Justin贏咗四百多元，仲有假嘅？
卓妮