政情：馮康率醫護四川義演

拉二胡為肥胡伴奏

醫管局中樂團會喺下個月頭飛去四川，先探訪四川都江堰友愛學校，再到四川省人民醫院舉行一場名為「川港同心滿杏林」嘅音樂會義演。馮醫生唔只醫人叻，原來佢連拉二胡都有一手。聽講馮康喺音樂會當日，會同一代二胡宗師黃安源同台演出，合奏一曲《獅子山下》添。

除咗馮康外，醫管局主席胡定旭都會表演番兩手，不過肥胡就唔係拉二胡，而係同董秀英醫生合唱《萬水千山總是情》，屆時馮康仲會用二胡領奏添。唔少人都好想睇呢個醫護鐵三角嘅同場表演，可惜佢哋「只可一不可再」，暫時冇打算喺香港encore。