中環耳目:梁孔德回鄉擦順德美食

順德人出名識飲識食,香港足總主席梁孔德成日都心掛掛家鄉順德菜,所以一得閒就會返去食番餐。雖然好多家鄉菜嘅名堂佢都唔記得,但係有啲特色菜佢就印象深刻。

好似我哋形容一啲嘢好冗長,我哋會叫佢做「水蛇春咁長」,水蛇春即係水蛇嘅卵子,梁主席話佢真係見過水蛇嘅春,確係好長,順德仲有得食添,不過佢就唔敢食,但係水蛇湯佢就夠膽飲,仲大讚奶白色嘅湯水好鮮甜。其他好似大良炒牛奶、焗禾蟲、炸蠶蛹炒芽菜等,食到梁主席耳仔郁。

可惜順德菜食材好難喺香港搵到,焗禾蟲呢味菜好似同香港絕緣咁,所以搞到佢心思思,耐唔耐就要返去祭一祭五臟廟,加上依家交通方便,一個鐘就可以上到去。話時話,之前梁主席太太梁劉柔芬話要感染老公齊齊低碳飲食,蠶蛹營養價值高,唔知梁主席會唔會反介紹畀太太呢?

卓妮