中環出更：雲維熹儲玩具車數以百計
香港汽車會（AA）主席雲維熹（Wesley）係名副其實嘅「車癡」，佢玩過無數靚車，屋企仲有數以百計嘅玩具車。佢依家仲係國際汽聯（FIA）亞洲區主席，係第一位香港人躋身FIA核心。佢正籌劃一場亞洲車手參與嘅亞洲區賽車盛事，賽場初步定於內地，希望年尾或明年可成事！
Wesley身上流着成吉思汗嘅血，係其第二十九代傳人，又係前全國政協委員雲大棉嘅長子，可謂出身名門。佢自細就好鍾意玩車仔，依家屋企都仲陳列咗數以百計嘅玩具車。但係卓妮問佢依家揸咩車，佢就唔願多講嘞！
Wesley都情迷於砌機場模型，佢嘅機場入邊有跑道、草地、機場大樓、工程車同埋各式各樣嘅飛機仔，經常砌完欣賞一排之後再拆過「重建」，所以對於機場嘅一事一物瞭若指掌。佢話好想加入另一個「AA」，即係香港機場管理局（Airport Authority）董事局喎！
Wesley參與唔少公職，近排佢心思思，仲想加入香港嘅智囊組織，為香港政治民生事務獻計添！
卓妮