水係生命之源，但絕對唔係取之不盡，用之不竭。好似呢次內地西南大旱咁，大河冇水，水庫乾塘，幾千萬人面臨斷水威脅，認真大鑊。所以話，平時唔珍惜水資源，有漏唔執，臨渴至掘井，乜都遲啦。
節約用水係大勢所趨，水務署亦煞有介事推行全面水資源策略。打頭炮嘅係「用水效益標籤計劃」，將沐浴花灑嘅用水效益標籤，按每分鐘流量分為四級，最多嘅可以慳水四成。水務署仲打算今年內將有關計劃擴展至水龍頭同洗衣機，而政府建築物同學校亦正陸續更換使用節水器具，大約要使一億六千萬。當局話喎，預計二十年後本港可以減少一億立方米食水消耗。
嘩，慳番一億立方米食水，聽落又確係幾吸引嘅，正所謂積少成多，涓滴成河，如果人人響應，個個慳水，咪唔使驚制水囉。
條數係就係咁計，效益標籤可以提高市民珍惜食水嘅意識，絕對值得支持，不過咁，唔係功夫茶潑冷水（有水都唔好亂嘥喇），效果一定係麻麻兼有限。何解？事關水務署管水唔慳水，佢哋其身不正，又點可以令市民相信效益標籤真係可以慳水吖。
嗱，講多無謂，數字最能夠說明問題。本港供水系統又殘又舊，鋪設嘅大多數係鐵水管，使用壽命只有二十五年，但係全港有三千公里水管已經用咗超過三十年，其中一成更處於高危狀態。結果係點有眼睇，地下水管今日爆完聽日又爆，呢度爆完嗰度又爆。原來香港水管嘅滲漏率高到你估都估唔到，居然高達兩成，每年總共有兩億立方米，相當於港幣七億嘅食水變坑渠水。咁搞法，就算有乜嘢效益標籤，市民點閂細水喉，慳慳埋埋都遠遠唔夠水管滲漏喇。
有條數更得人驚，原來香港好多地區仲用緊淡水沖廁，好似港島南區、屯門、元朗、西貢同離島等，多達一百三十萬居民焗住要用淡水沖廁，每年有八千二百萬立方米淡水就咁沖咗落鹹水海，你話幾浪費吖。
水務署有名你叫，係專門負責管理同維修供水系統嘅部門，家陣成個系統殘殘舊舊日漏夜漏，仲有百幾萬人日日用淡水沖廁，呢啲問題一直冇解決，講到浪費水資源，水務署呢個「冠軍」直頭係當之無愧啦。
計功夫茶話齋，節約用水最迫切要解決嘅問題，就係盡快更換殘舊嘅水管，以及全部改用鹹水沖廁。水務署本末倒置，連自己本分都未做好，水管有漏唔去執，淡水沖廁又唔理，咁就算推出幾多項效益標籤計劃，都係嘥氣喇！