政情：王喜勇救同袍冇花假

暫時停職嘅無綫電視業務總經理陳志雲早前因涉嫌貪污，被廉署拘捕，轟動全城，大難當前，佢嘅好朋友藝人王喜不離不棄，幫佢買碌柚葉，做法事為佢積德，認真唔話得！正因如此，王喜嘅過去，亦畀人摷番出嚟。好多人都知王喜做過警察，但原來佢不但係警察咁簡單，仲曾經喺一場企圖殺警縱火案中，勇救兩名半昏迷嘅同袍，警務處近日計劃出版一本書，將十個同袍所做嘅英雄事迹輯錄成書，當中包括王喜勇救同袍一幕。
喺戲中扮演過警察嘅王喜（右），原來當年都有過英勇救人嘅事迹。 （資料圖片）
喺戲中扮演過警察嘅王喜（右），原來當年都有過英勇救人嘅事迹。 （資料圖片）

孭女警行十幾層樓梯

王喜喺《烈火雄心》劇集中嘅英勇形象深入民心，估唔到喺現實中嘅佢都咁英勇，話說佢八九年仲當緊差，某日有兇徒圖謀殺警，先喺彌敦道一幢大廈十三樓升降機門外兩側堆放易燃物品，再堵塞走廊兩端，之後報警謊稱上址有人爆竊，呃咗一名警長及四名警員到場調查，令佢哋身陷重圍，其中三人包括帶頭嘅警長更畀人熏到半昏迷，咁啱王喜喺附近行必，一聽到召喚即刻衝上去現場，最終救番同袍，王喜仲記得當時孭住其中一個女警行十幾層樓梯落樓添，難怪今時今日好友惹官非，王喜四處為佢奔走。

當年王喜救人後，亦虛脫得要由救護員以擔架送上救護車。 （黑白圖片）
  • 當年王喜救人後，亦虛脫得要由救護員以擔架送上救護車。 （黑白圖片）