政情：譚志源英文小說贈囝囝
譚志源做咗特首辦主任後，佢老細煲呔曾先後爆出「慳電膽益親家」、「雷曼弟婦」同「禮賓府家鬼」事件，搞到佢日日做到無停手，少咗好多時間陪家人。不過早前我哋就喺金鐘太古廣場，撞到Raymond譚百忙之中抽空同囝囝一齊逛書店，共享天倫樂。
當日我哋喺太古廣場一間書店Kelly & Walsh，撞到Raymond同佢個着住皮褸、掛上headphone嘅型爆囝囝Justin，一齊喺英文書架度研究咗好耐，最後Raymond拎起本愛爾蘭作家Darren Shan嘅著作《Demon Thief》去畀錢。問Raymond有無指導囝囝、推介好書畀佢，佢耍手擰頭，話自己好開放，睇書呢家嘢一切都隨囝囝自己意思喎。
愛爾蘭作家Darren Shan係一個「七十後」作家，年紀輕輕就開始佢嘅寫作生涯，佢寫嘅青少年驚慄系列《The Demonata》更加風靡全球，奠定咗佢「兒童驚慄大師」嘅地位。《The Demonata》同《哈利波特》其實有啲相似，但《The Demonata》比較陰森，Raymond囝囝Justin睇嘅《Demon Thief》，就係呢個系列嘅第二本著作。當有關「九十後」青年掛住打機行街時，Justin就睇書學英文；睇嚟Raymond即使日忙夜忙，都唔使掛心。