政情：金刀梁慳儉買樓保值
行政會議成員「金刀梁」梁智鴻醫生，曾經被老婆大人踢爆佢嘅財物一個皮篋就裝得晒，前幾日佢哋拍拖出席一個頒獎禮時，竟然都係着住結婚當日着嘅西裝禮服，令佢知慳識儉嘅形象更深入民心。不過，金刀梁好識計數，咁多年嚟未停過將彈藥攞嚟買樓，今年初又以老婆名義喺中西區添置咗一個住宅物業，令佢同老婆名下嘅物業增至七個。
近排樓市係咁升，佢哋荷包實脹卜卜啦！我哋問金刀梁點解咁識投資，佢依然好似平時咁低調，話自己好耐無買樓，啲物業唔係自己住就係畀外父住，無咩投資心得喎；不過佢承認老婆有時會買賣物業嘅。金刀梁孝順外父不特止，仲將自己嘅財政大權交畀老婆，咁老婆嘅咪等於佢嘅囉！
金刀梁嘅七個物業除咗一個喺倫敦之外，其餘六個都喺港島，而且集中於中西區，港島區物業一向升值能力較高，金刀梁夫婦果然投資有道。