政情：晒旅發局成績田少認叻

田少喺家書中，如數家珍逐單講。佢話在任旅發局主席三年間經歷唔少挑戰，最深刻係○七年上任首日就立即要處理內地「零團費」強迫旅客購物風波；過去兩年又分別面對爆發金融海嘯及人類豬流感，但呢三年訪港旅客同旅遊消費都有增長，今年首季嘅旅客數字較去年同期上升百分之十五，最重要係幫助到中小企業嘅零售及飲食等行業。

大搞龍舟邀請賽

過去三年訪港旅客上升，田少又歸功於旅發局不斷推出「新橋」，與商界合作舉辦大型活動，提升香港嘅吸引力，包括國金二期除夕煙火倒數、去年夏天嘅流行音樂節、西九美酒佳餚巡禮等。田少仲雄心勃勃話，未來三年任期會繼續辦好每年幾個大型活動，今年更會全新推出一項為期三日嘅香港龍舟嘉年華，將國際龍舟邀請賽搬返維港舉行，實行發大嚟搞，有信心今年訪港旅客打破三千一百萬人次大關。

除「大花筒」毒瘤

不過，田少透露自己任內最高興嘅，反而係上場後因應審計署和立法會帳目委員會報告嘅建議，進行內部改革，增加問責和透明度，成功切除為人詬病嘅「大花筒」毒瘤，同時加強與業界溝通，更準確掌握旅客需求。田少所言非虛，事關他一上場就手起刀落削減總幹事職權及減薪一成，建立慳家形象，而上月有菲律賓旅行團被人賣豬仔，旅發局亦配合業界請團友上山頂免費享受豐富午餐，迅速拆咗個炸彈。田少喺家書中不忘答謝旅發局同事過去嘅努力和辛勞，特別係每逢農曆新年、聖誕節及除夕等大節日仍緊守崗位。

田少做旅發局主席做得咁起勁，相反佢以前領導嘅自由黨就每況愈下，最近嘅「廿蚊風波」，更令自由黨雪上加霜，難怪有該黨核心成員叫佢多啲幫手搞黨務，唔知佢有無打算做番自由黨黨魁呢？