提起電影《烈火雄心》，印象最深嘅一定係「爆燃（Backdraft）」鏡頭，連套戲都攞佢嚟做名。爆燃指火災現場缺氧燃燒，表面睇冇乜火，如果大量空氣突然湧入，就會導致爆發式劇烈燃燒，後果不堪設想。
點解諗起呢套荷里活大製作？呢，月初長沙灣麗昌工廠大廈四級火，消防隊目楊俊傑不幸殉職。事件引爆消防處前線人員嘅怨氣，尤其係消防處承認事件懷疑涉及通訊中心有操作員延遲將火警升級，消防處內部圍繞責任誰屬出現內訌，處方、工會、前線人員各有各講，十足爆燃咁震撼，市民唔驚就假。
消防處處長盧振雄尋日上電台節目解畫，佢話事件懷疑因為人為錯誤而延遲將火警升級，已派出首長級人員負責調查。當日控制台收到火警升級訊息，最初三十秒工作人員冇處理，訊息交畀第二個人，十秒鐘後被刪除。但佢又強調，刪除訊息同消防員殉職未必有直接關係，處方會研究制訂程序，令未睇過嘅訊息唔能夠刪除喎。
盧振雄仲自賣自誇，強調本港消防設備先進，處方會確保滅火救援能力。至於消防員要用通訊終端機上報火警升級，佢就話咁做法好罕見，事發後已指示下屬，呈報重要訊息應該優先使用無線電。
殊不知，盧振雄呢頭講到實牙實齒，嗰頭就有前線消防員致電反駁，話佢講嘅同事實不符。有消防員坦言冒着被處分嘅危險，都要踢爆消防處上、下層嘅溝通好似「斷橋」咁，管理層一直漠視前線人員裝備及資源不足嘅投訴，簡直係草率、官僚。
嘩，上司同下屬完全唔同嘴形，各有各噏，市民信邊個先？冇錯，呢場致命四級大火仍然調查中，責任誰屬唔可以過早落定論，但事後內部爭拗嘅種種噪音，唔止令市民十分困擾，更加反映出消防處內部管理同溝通十分混亂。
長沙灣工廠大廈四級火發生後，有消息人士爆料話，當日有人明知有火警發生，小休照抖可也，食咗早餐至算，因為火警升級訊息冇人處理，卒之導致悲劇發生。但通訊中心員工就堅持小休符合指引，更投訴通訊中心近年人手緊張，成日冇得休，操作員壓力倍增。
亦有前線消防員批評裝備嚴重不足，連最緊要嘅無線電通訊都成日被干擾，火場內消防員惟有改用手機與同袍聯絡。
話時話，消防員裝備落後老化已經係老大難問題喇，○八年導致兩名消防員殉職嘅旺角嘉禾大廈五級大火，據講其中一名殉職消防員曾多次透過無線電系統求助不果，竟然要打九九九求救。
估唔到事隔近兩年，當局話就話已經採用「未算最尖端，亦都唔落後」嘅設備，但情況並冇改善，前線消防員繼續搵命博。處方尋日仲畀人踢爆，新購買嘅儀器並冇諮詢前線人員用唔用得，唉，閉門造車，得物無所用，唔怪得搞到咁大鑊喇。
祝融無情，人命關天，救火點可以咁兒戲㗎。如果消防處管理混亂唔改善，漏洞唔堵塞，繼續咁拗落去，唔止悲劇可能重演，仲隨時好似爆燃咁，後果更嚴重！