政情：金刀梁扭傷溫情止痛
早前有傳安老事務委員會主席梁智鴻跌傷隻腳，尋日喺個活動見到佢，先知道佢只係扭傷，唔係跌傷。原來金刀梁上周同愛滋病基金會去甘肅探訪山區醫院同參觀當地醫療設備時，要行經一條九曲十三彎嘅山路，點知唔小心差錯腳，扭親右邊大腿條筋。佢話其實好小事，食咗兩、三日止痛藥已經好番，仲話平時少行山，行路搭港鐵就多；雖然扭親嗰陣有小小痛，但見到當地嘅村民咁熱情，開心到乜痛都唔記得晒。
金刀梁下晝出席佢自己有份寫嘅新書《同一屋簷下的天使》發布會，婦女事務委員會主席高靜芝同民政事務局副局長許曉暉隨即上前問候，佢好感動咁話：「全港市民都好錫我！」
生於醫學世家嘅金刀梁喺新書提到，原來一代名醫梁財信係佢祖先，試過用鴨腳幫隻雞駁腳，但遺憾自己未返過鄉下。愛滋病基金會下周有個慈善晚宴，當中有個「扮梁智鴻比賽」，獎品係「金刀梁」親自操刀做外科手術一次。問許曉暉有無興趣參加，佢知道係咁嘅獎品，即刻耍手擰頭話：「免費都唔好搞喇！」