政情：高錕夫婦 返美叉電
榮獲諾貝爾物理學獎嘅「光纖之父」高錕，早前重返香港同大家分享喜悅。不過高錕名氣太大，每個機構都捉住佢唔放，搞到佢要出席大量公開活動，既要去步行籌款，又要返中學母校，仲要出席康樂及文化事務署搞嘅高錕小型張郵票設計比賽頒獎等等，行程分分鐘密過佢教書嗰陣。高錕夫婦近兩個月嘅忙碌生活尋日終於完結，雙雙返美國休息吓，佢哋臨走前仲透過中大向大家講再見，多謝香港市民嘅熱情款待，希望下次再有機會見面咁話！
感謝港人關心
雖然喺香港嘅行程多到數唔晒，不過一向樂觀嘅高錕夫婦一啲都唔介意，佢哋總結今次行程時話，今次係既難忘又享受嘅一次旅程，完全感受到香港人對佢哋嘅熱情同支持，好感謝大家咁關心佢哋。一直致力推動社會關注老人癡呆症嘅高錕太太黃美芸仲關注到香港人口老化問題日益嚴重，希望大家多啲了解老人癡呆嘅病徵。高錕夫婦離港在即仲心繫香港，難怪大家對佢哋咁尊敬。