政情：煲呔曾臭脾氣靠擦鞋減壓

煲呔曾尋日自爆佢鍾意擦鞋減壓，講嘅唔係拍馬屁，而真係拎對皮鞋出嚟擦！擦！擦！佢話一得閒就攞鞋油逐吋逐吋擦鞋，慢慢將對鞋擦到好似鏡仔咁「立立令」，用力又要好小心，否則就會擦到變「豆皮婆」，喺呢個過程中，可以訓練到人嘅毅力同耐性；仲話自己從來無幫襯過中環戲院里班擦鞋匠，有時間可以同佢哋切磋切磋喎。

卿姐難接受感丟架

不過煲呔曾每隔幾日就對議員公眾黑一次面，睇嚟佢嘅耐性擦極都欠奉。煲呔曾就話大家都睇到佢嘅ＥＱ（情緒智商）近年有冇進步，暗指自己已經算唔錯，不過由佢早前出席答問大會時，攞埋德蘭修女張相出嚟都係面燶燶，就知佢嘅ＥＱ有跌冇升啦！

ＥＱ低都算，煲呔曾依然咁自以為是。佢喺節目中主動提到早前國務院總理溫家寶清楚闡明香港有五點深層次矛盾，仲話「好開心」溫總自己出嚟解釋，唔使香港人「估估吓」。雖然溫總講到明五點矛盾，係包括三點經濟同兩項民生及政治問題，早前話深層次矛盾只係經濟問題嘅煲呔曾仲繼續死撐，話溫總主要都係關心香港經濟，不過見香港嘅政改問題炒到熱烘烘，先順便加兩句講政改。一句講晒，佢根本就係死唔認錯。

其實講到擦鞋，大家都聯想到拍馬屁，煲呔曾咁都攞嚟大肆發揮，難怪民主黨立法會議員劉慧卿聽完都話好丟架、好難接受。卿姐話，即使煲呔曾想示弱，都唔應該講啲咁嘅嘢喎。煲呔曾喺節目中口口聲聲話好多政策依家睇番都係「唔做好過」，當中可能包括做特首呢個決定；既然係咁就咪做喇，到時肯定有好多人夾道「送行」！