中環出更：林逸之率高徒書畫展晒冷
卓妮前晚去咗香港中央圖書館地下展覽廳欣賞「藝術拓荒者作品展2010」。呢個展覽嘅參展者猛人如雲，余若薇同細女、DHL前主席鍾普洋夫人鍾海倫、城市大學教授何炘基、瑞士銀行執行董事潘靜怡、和記電訊財務總裁陳婉真等等，仲搵咗合和實業主席胡應湘（哥頓）為展覽開幕做主禮嘉賓。
可以結合咁多城中名人一齊作聯合展覽，背後發功嘅人當然分量十足，佢就係書畫家林逸之老師，今次呢個作品展，就係林老師率領各位高足們嘅展覽。
師承已故內地著名畫家陳大羽嘅林老師，書法方面就受業於蕭嫻同林散之。林老師六歲開始學畫畫，每日畫十幾個鐘，不過佢謙稱自己「三年不見物」，畫咗十年先敢將作品展出。林老師話「拓荒展」已經搞咗幾年，每次畫展前佢都有好大壓力，但睇到學生嘅展品就放心晒，尤其是今年，覺得學生嘅作品比自己嘅第一次更好，大讚學生們稱得上係書畫家。
陳婉真學畫享天倫
卓妮發現學書畫仲可以同享家庭樂，好似和記電訊財務總裁陳婉真同老公吳頌煒以至囡囡Michelle，都係林老師嘅學生。學咗八年山水畫嘅陳婉真係今年畫展籌委會主席，同囡囡一齊學畫，老公就習字，一家人有同一嗜好，非常溫馨。
哥頓攜子代妻撐場
至於哥頓就係代妻出席，胡太有事嚟唔到，哥頓就同囝囝胡文新一早到場。胡太由八十年代開始跟老師學畫，係老師第一批學生，加上知識豐富，所以領悟力好好。哥頓笑笑口投訴太太從來無送過畫作畀佢，但就讚太太嘅手藝除咗係畫紙上，喺廚藝嘅領域亦相當出色，撚手菜多到佢要搵囝囝代答，胡文新最愛媽咪嘅獨門葡國雞，話無人能及。
至於有老公捧場嘅余若薇就係囡囡凱琦嘅「師妹」，幾年前因為要寫揮春先開始學字，依家佢同凱琦crossover，喺囡囡嘅畫作題字，夠晒親子。
卓妮