凡事講個「理」字，唔能夠欺人太甚，正如莊子話齋，「盜亦有道」，以前做賊嘅都唔敢做得太絕喇。但勢估唔到，口口聲聲「以民為本」嘅港府居然連乜嘢叫做道義，乜嘢叫做合情合理都唔知。
呢，當局舊年趁實施新高中學制，將智障學童資助年齡上限由二十歲降到十八歲，令唔少智障學童面臨失學，引起家長和關注團體強烈不滿。其中一名受影響智障學生由媽媽代表，入稟高等法院申請司法覆核，被判敗訴。佢提出上訴，並向平機會投訴，港府後來先至「補鑊」，放棄智障生離校嘅年齡上限，變相認衰。
不過，件事並冇畫上句號。呢位智障學生早排突然收到律政司嘅追討信，要佢償還二十七萬蚊訟費。又會咁嘅？佢唔係申請咗法律援助咩？原來，按照法律援助署嘅規定，資助金額由法援證書發出日起計算，唔包之前嘅訟費。所以，雖然事主喺提出司法覆核第二日即刻申請法援，兩個禮拜後獲批，但由於司法覆核已開始聆訊，當局話要追番之前嘅訟費喎。
就算其他家庭，二十七萬蚊都唔係一筆細數，更何況一個來自普通家庭嘅智障學童。迫於無奈，事主只好寫信畀律政司司長求情，希望可以取消法援證書發出前嘅訟費，唔係嘅話，惟有申請破產。雖然話佢自己身無分文，破產冇乜實際損失，但係智障學生因為政府追數而破產，唔止係國際笑話，簡直係香港嘅恥辱！
古人話，人皆有惻隱之心。港府唔止無惻隱之心，而且無理、無良。屋企有個智障仔女，咪話經濟負擔唔輕，一日廿四小時都要實，精神壓力已經夠晒大，依家仲要失驚無神畀政府追咁大筆數，家人隨時壓力爆煲都有之。
話時話，律政司可以話係官僚到冇朋友，淨係識按本子辦事，唔識因人制宜，連最起碼嘅同情心都欠奉，簡直混帳。雖然話照足規矩辦事啫，但合法都要合情合理㗎！求助人係家境普通嘅智障學童，官司涉及嘅唔止佢一個人嘅利益，更關乎處境相似嘅好多智障人士嘅利益，佢提出司法覆核，係基於公義同公眾利益，呢啲因素法援署有冇諗過呢？
其實，對於堂堂政府來講，區區二十七萬蚊微不足道，但對智障學童絕對係天文數字。港府對需要幫助嘅市民一毛不拔，但無厘頭嘅冤枉錢就唔知使咗幾多。嗱，例如民政事務總署使咗近千萬蚊喺多間社區中心外牆安裝大型ＬＥＤ電子屏幕，話「推廣環保」喎，點知選址有啲鬼咁隱蔽，有啲仲對住條天橋，根本就冇人睇。平均近百萬一部嘅電子屏幕變咗擺設，淨係電費都有排計喇。
又例如五區補選咁，無無謂謂，都要攞一億五千萬出嚟搞，如果呢筆錢攞嚟增加特殊學校撥款，好多智障學童就唔使畀當局趕出校門啦！