明日是「世界睡眠日」。衞生署○八年調查指，失眠人士比例多達兩成，最近有調查更指近六成港人，過去一年有失眠問題。
其實，毋須調查都知港人多失眠，鬼咩！政府扶貧冇方，回歸後貧窮人口居高不下，有成一百二十三萬人，最近，按統計處去年第四季數據顯示，月入不足四千元低薪人士數目，已遞增至四十一萬多人。「詩聖」杜甫睡不着皆因：不眠憂戰伐，無力正乾坤。貧窮人士失眠必多：不眠憂柴米，無期等公屋！
失眠是城市人的通病。老朽天生達觀，深得昔日有個叫高峰禪師真傳「上床法」：一盞孤燈照夜台，上床別了襪和鞋；三魂七魄夢中去，未委明朝來不來？老朽善忘，是以甚少追究平生五十年，過去的舊夢，都隨混濁的懸浮粒子一同被雨打風吹去！
當然，日日都好好瞓，朝朝一醒就諗退休嘅煲呔曾，應該係全港睡眠質素最好的，藉此「世界睡眠日」，好應該請佢出來發表吓如何克服失眠呢個影響健康嘅深層次問題！今趟係「問題」，不是「矛盾」，煲呔曾你千萬唔好因咁而遭遇平生第一次失眠，若然，老朽罪大惡極，罰來年不得到禮賓府賞杜鵑花，要在蝸居狂穿膠花！
煲呔曾知道全港有成過百萬人經常失眠，相信佢一定唔會袖手旁觀，潮流興「為民請命」，煲呔曾親自領軍抗毒，令青少年重上正途；如今更應該發揮其真正強項，教全港百姓遠離失眠，尤其離婚婦如何酣睡。
煲呔曾，今趟你真係要做一個出色的催眠大師，讓長期失眠一族，感受到你真係做好份工！努力！把握機會！