政情：四叔打賭賣天匯無假動作

恒基地產旗下樓盤天匯部分單位，被指未按合約原定時間完成交易，恒基地產主席李兆基（四叔）尋日親自出來澄清，指部分單位未完成交易，係因為要遷就買家，強調單位百分之百唔係自己人買，絕無假動作，又話如果係自己人買番，應該即刻交易避免留手尾先較合理。四叔仲同傳媒打賭話：「我可以同你哋賭錢，你哋出一萬蚊，我賠一百萬蚊，一萬賠一百萬，證明無假動作喺度。」信唔信由你！