政情：蔡瑩璧怕濕疹要「封杯」
商務及經濟發展局常秘蔡瑩璧（Yvonne）係官場中少數飲得嘅女將，紅酒、香檳、茅台瓣瓣精。近日Yvonne宣布「封杯」唔飲，理由係濕疹又再發作，惟有聽中醫師話，乖乖戒口。
呢排商界春茗一浪接一浪，Yvonne職責所在一一賞面到賀，忙到氹氹轉，不過向來飲得嘅佢，早前喺三八婦女節酒會上竟然揸住杯清水，點解咁寡？親述戒酒之謎。佢自爆一直受濕疹困擾，周身唔自在，求治西醫後略見好轉，但始終唔斷尾。
近日Yvonne決定轉睇中醫，仲煲緊中藥食，為免啲藥同酒精有相沖，伊人聽中醫師勸戒，滴酒不沾。問佢戒酒辛唔辛苦，Yvonne笑住擰頭，話戒酒只係暫時性，唔代表以後唔飲得，淺嘗輕嘗都可以嘅。