政情：叫拆街板 議員鬧爆林D9
公文袋同社民連策動所謂嘅五區「公投」認真累街坊，為五月中舉行嘅補選，政府要求所有立法會同區議會議員，喺今個月中之前拆晒啲街板，結果建制派議員大力反對，當局於是延遲拆板期限至下周五（廿六日），仲提出Ｂ計劃容許議員唔使拆板，等政制事務委員會傾完先算，結果政制及內地事務局局長林瑞麟（林D9）被建制派議員鬧到狗血淋頭。
好似工業界議員林大輝咁，佢話自己拆咗八十八塊，依家剩低六十九塊半天吊，難怪佢兜口兜面鬧爆林D9：「唔鬧你都唔得！」仲話政府政治觸覺不足，後知後覺，唔應該一早叫人拆街板。滿肚怨氣嘅何止大輝一人，獨立議員葉劉淑儀早已拆晒佢喺港島區嗰一百七十五塊街板，前後花咗三萬幾蚊，聽到都肉赤。連公文袋嘅余若薇都話拆咗部分街板，依家政府推Ｂ計劃，等於懲罰守法嘅議員，大家嘅矛頭都係直指林D9。林D9尋日聽完議員吐苦水後無話可說，話下周末前會作出清晰交代，睇吓佢下次點執生！