政情：李本瀅李樂詩鬥環保
地球暖化嚴重，人人都講環保，推動環保嘅人就變得更加環保，有幾環保？作為環保先鋒嘅「極地探險家」李樂詩、天文台台長李本瀅及環境保護運動委員會主席李宗德，尋日出席一項環保活動時同大家分享環保妙法，可謂各師各法。李樂詩話自己環保咗廿幾年，出入只會行路同乘搭公共交通工具，半年先至食一次肉，平時以素食為主。
李本瀅同李樂詩一樣係少肉多菜，晚餐食炒菜加紅米飯，夠晒健康，午餐連菜都唔食，只食一件果占多士。李本瀅話，太太和仔女都好認同佢堅持環保。李宗德就話自己開始年紀大，平時食飯應酬點菜會清淡啲，少食油膩食物及肉類；佢仲有一樣環保秘技，就係出外食飯唔使侍應換碟，事關少用一隻碟就用少啲水洗，夠晒環保。
李本瀅同李宗德有一個共通點，就係平時盡可能用較細汽缸容積嘅汽車，而李宗德更規定司機停車熄匙，減少廢氣排放。