政情：鄉議局正生再拗手瓜

縱使正生以學校有大石墜下危險為由要求遷校，可惜去年被廉署「抄家」一役，唔止或多或少影響正生形象。教育局局長孫明揚前日喺立法會上大條道理話，正生遲遲未有向當局提交詳細財務及課程等資料，仲警告如果情況無改善，當局唔排除將正生學生暫時調配到其他戒毒院舍，以便重建現時正生書院嘅校舍。

傳南約校舍作特殊學校

孫公嘅表態對鄉議局來說應該係個喜訊，可惜鄉議局最近亦收到孫公信函，就鄉議局早前提交嘅「新界鄉議局南約區學校復校計劃書」回覆，指南約區學童不足，並透露當局正考慮正生書院嘅遷校申請。鄉議局見孫公咁講即時起弶，澄清當局所指嘅「計劃書」只係意見書，主席劉皇發決定短期內向當局提交正式復校計劃書申請，希望當局公平處理。

睇孫公個勢似乎兩邊都唔幫，但實際上葫蘆裏面賣乜嘢藥，真係只有孫公自己先至知道。

據聞最近又傳出一個新方案，話即使當局唔批准南約區中學復校，亦不想讓正生入主，寧願將校舍撥作營辦寄宿特殊學校，方便東涌區弱能學童上學，解決東涌興建寄宿特殊學校嘅紛爭。離島區議員黃福根話，最近都聽到梅窩居民有上述訴求，佢會先做居民調查後才決定係咪向當局提出建議。