中環出更：李雲迪談情：愛我是比較辛苦的
人各有志，「八十後」嘅李雲迪，將自己奉獻畀音樂，連愛情都放埋一邊。雲迪喺中港台日有唔少fans，每次被問起感情事，佢都係一貫口脗︰「太忙啦，順其自然吧！」早排雲迪嚟香港，談起戀愛狀況，佢有感而發話，依家一個月出門幾次，無時間照顧另一半，唔可以同普通人一樣咁談戀愛：「要愛我是比較辛苦，但沒辦法。對於結婚生孩子這些事情，我沒有時間表，總之順其自然。」總之能handle佢會盡量handle。
思想傳統 注重內涵
時下「八十後」好講創新，雲迪卻話自己屬於思想傳統嘅一群，可能同佢喜歡古典音樂有關，佢鍾意維持藝術原貌，唔鍾意畫蛇添足嘅誇張，因此佢注重內涵，鍾意本質嘅嘢，覺得咁樣先可以歷久常新。佢話：「我不會追求潮流，可能比較悶，我不需要一個興奮點，可能再過十年我再看看自我的要求有甚麼提升，會發現不會有甚麼很驚喜，哈哈……」
雲迪最近推出嘅蕭邦夜曲鋼琴全集尋日正式推出，佢覺得夜曲係最能代表蕭邦風格嘅作品，詩意浪漫之餘，亦有情緒起伏。雲迪喜歡詩意，呢個專輯喺瑞士蘇黎世錄製，環境靚之餘，又有最得心應手嘅鋼琴陪住，所以用咗兩日就錄完。喺雲迪眼中，浪漫係一種氣氛，好似錄音後，同工作人員食一餐飯，喝一點酒已經係好浪漫嘅事。藝術家果然與眾不同。
卓妮