中環出更：趙少昂名畫 唐楚男蔡克昭「晒冷」
中國風熱吹，近代名家畫作熱炒成風。嶺南派大師趙少昂嘅書畫更被炒至天價。唔講唔知，原來前保良局主席唐楚男律師同前律師會會長蔡克剛細佬蔡克昭律師，私人珍藏咗唔少趙少昂畫作。兩人花十多年時間，收集多達一百一十七幅趙少昂精品，藏量之豐，堪稱全港之冠。呢批珍藏，四月將首次喺灣仔會展「晒冷」展出。
展出精品 起碼值千萬
今次展覽由「游藝堂」同「香港蘇富比」合辦，名為「天風薪傳」。卓妮日前相約兩位「游藝堂」揸Fit人、唐楚男及蔡克昭律師傾吓偈。唐律師笑言首次買畫時乜都唔識，隨意睇睇便買咗，結果買番嚟嘅全是贗品，被騙逾廿萬。痛定思痛下，拉埋蔡律師埋首猛刨名家書畫冊，做足功課。
九○年，兩人以七萬元出擊購入一代宗師張大千嘅山水作品，唔使幾耐就升值到十萬，自此二人四出搜羅張大千及趙少昂名作。
唐律師自嘲係「驗屍官」，買畫前除多番鑑證外，更託相熟朋友直接向當時仍然在生嘅張大千及趙少昂查證真偽，得大師點頭確認，先至敢扑錘，至今好多都升咗值。不過唐律師話：「多多錢都唔賣，賣咗就買唔番。」自從張大千及趙少昂相繼去世後，無咗大師確認，唐蔡二人已唔敢再買畫嘞。
不過，今次「天風薪傳」畫展只展出趙少昂精品，唐律師唔肯講批畫估價有幾高，只話起碼以千萬元計。展覽將於四月二日喺會展揭幕，展期由四月三日至七日，大家不妨落足眼力望多兩眼。
展覽完成後，部分藏品會送贈予外國博物館，餘下就送往英國收藏。何解偏偏鍾情趙少昂畫作？蔡律師欣賞佢色澤豐富明麗，格調新穎，閒來同知己品茶談畫，壓力全消；唐律師就喜歡趙少昂寫畫意境獨特，自己仲喜歡獨坐畫前，思緒游走喺書畫間，樂趣無窮。
卓妮