中環出更（二）：李鋈麟戴限量卡地亞TORTUE
手袋可以攻陷女人心房，手錶就可以令男人着迷。身兼東華三院總理同灣仔中西區工商業聯合會主席嘅李鋈麟，前晚同東華主席李三元一齊出席聯合會春茗，原來李三元都係該會會長，果然係李氏一家親；唔講唔知，兩人都係卡地亞（Cartier）迷。
李鋈麟平時熱情好客，但呢晚靜咗少少，原來佢月前踢波搞到右膝頭斷咗十字韌帶，早幾日啱啱做咗手術要坐輪椅，但唔使擔心，佢話抖個零兩個月就會好番。一向衣着整齊嘅佢雖然要乖乖地坐低，但打扮一絲不苟，左手戴住個鑽錶更加耀眼。
手錶可保值，李鋈麟素有研究，好似今次呢隻就係全球限量五隻嘅卡地亞TORTUE，09年開售每隻盛惠459萬，香港只係得一隻，李鋈麟好手快喺香港卡地亞專門店買咗。呢隻酒桶形設計嘅TORTUE，配上黑色鱷魚皮錶帶，錶身鑲咗多粒方鑽。除外形外，隻錶仲有萬年曆、陀飛輪同日月星功能。
卓妮