表面睇，預算案幾乎瓣瓣照顧到，連使錢鼓勵人去打工都做埋。但實際上好多迫切需要增撥資源嘅地方，港府係咁意做個樣增撥些少敷衍下算數，長者護理服務就係典型例子嘞。

鬍鬚曾話，未來二、三十年，六十五歲以上長者人數會大幅上升，到二○三六年，每四個人就有一位，護理服務需求會持續大幅上升。唔使你鬍鬚曾講，係人都知人口老化愈來愈嚴重，安老服務質素每況愈下啦。雖然當局死口唔認，但市民都知道問題根源係資源嚴重不足。食多濕滯，講多無謂，問題點解決先？

港府話會加強院舍服務，照顧唔能夠喺屋企安老、需要護養照顧嘅長者喎。咁增撥幾多資源呀？巴閉咯，一億六千萬元咁大把，可以額外提供超過一千個宿位。按鬍鬚曾嘅講法，已經比上一份預算案增加嘅宿位多出六成以上喇。

資源係就係多咗，至弊當局長期忽視人口老化問題，又冇制訂相應措施，安老院舍嚴重供不應求。嗱，目前政府資助嘅長者宿位全港得二萬六千個，只有發達地區標準嘅一半。等唔到宿位已經辭世嘅長者由○六年嘅二千一百幾人，急升到○八年嘅二千五百幾人。

當局對公公婆婆欠債太多，加得嗰一千個宿位依然係僧多粥少，根本趕唔上人口老化速度，咁樣解決問題，簡直杯水車薪。

鬍鬚曾口口聲聲港府有責任向有困難市民提供幫助，依家咁多老人家晚景淒涼，如果當局有心幫佢哋，就應該加大支援力度。之但係，港府啲錢呢度掟啲，嗰度Fing啲，唔等使嘅就鬼咁疏爽，有燃眉之急嘅，睬你都傻。

預算案所謂「紓困」措施，錦上添花居多，雪中送炭嘅少之又少。嗱，淨係寬免商業登記費一年呢項，庫房就少收咗約十八個億。計落，多咗呢筆錢，就可以為長者額外提供過萬個安老宿位，又點會有咁多公公婆婆未輪到就走咗吖。

講開又講，除咗宿位奇缺之外，長者成日用嘅其他服務，當局一樣做到唔湯唔水，最明顯就係救護車服務嘞。因為資源不足，好多白車超齡服役，經常突然跪低，白車服務延誤一直為人詬病。呢，尋日荃灣有位患心臟病嘅八十幾歲老伯喺大廈梯間突然暈低，因為荃灣區三架白車全部做緊嘢，消防處要由長沙灣調車去救人，結果遲晒大到，阿伯送院搶救後不治。

屋企暈低冇白車嚟，輪候院舍宿位又無了期。鬍鬚曾喺預算案仲好意思噏乜嘢「居家安老為本、院舍照顧為後援」，計功夫茶話齋，呢個政府安老免問，棄老、虐老就有份。