不如咁講啦，冇傳統就冇現代，冇阿爺就冇乖孫。傳統有時確係好老土，甚至好殘酷，冇人再希望見到女人三寸金蓮痛苦紮腳，之但係只要經得過歲月洗禮留到今時今日，通常都係好嘢，絕對值得珍而重之。譬如話，假如你阿爺有一個發霉封塵嘅樟木籠留低畀你，千祈唔好當垃圾「戾手」掉去堆填區，因為古董樟木籠其實好有市場價值，掉咗你就呻笨。

香港人保育意識愈來愈高漲，對於傳統愈來愈重視，所以當日天星碼頭一話拆鐘樓，嘩！嘈到反艇！然後又話要拆皇后碼頭，嘩！炒蝦拆蟹！

好嘞，既然民間保育意識高漲，政府係咪應該以民為本，盡力保護傳統遺產？唔好唔記得，涼茶已經榮獲國務院批准成為國家級非物質文化遺產，至於粵劇，更加威威，舊年被列作聯合國人類非物質文化遺產，成為香港第一項世界性傳統，受到地球村高度重視。呢啲都係好開始，理應唔好畀佢停。

咦咦咦，咪住先，功夫茶記得曾經有人提議過，將別具風味嘅港式茶餐廳向聯合國申請列作人類非物質文化遺產，雖然聽落有少少搞笑成分，不過諗深一層都不失為一項有益有建設性嘅面子工程，點解家陣好似冇乜人再提起？係咪不了了之？

唉，怕且又係遲鈍龜速嘅官僚累事。特區政府早於○六年提出編製香港首份非物質文化遺產清單，事隔四年嘞，你估進展如何？其實話佢龜速已經畀面，因為進展幾乎等於零。一直歎慢板嘅政府係咁拖呀拖，拖到舊年先至叫做委聘專家展開普查。

喂，普查咋噃，即係搵料，正式清單十畫未有一撇。即使日後終於得出一份非物質文化遺產清單，大家唔好以為優良傳統從此安枕無憂受到保護，負責首期普查嘅香港科技大學華南研究中心主任廖迪生係咁講嘅，政府不但處理非物質文化遺產起步慢過日本以及南韓等等鄰近地區，而且至今未有任何保育政策配合，擔心日後即使訂出清單，有關項目仍然難逃灰飛煙滅命運！

係呀，香港傳統其實到處係寶，例如大坑舞火龍，又例如長洲太平清醮，其他例子多不勝數。傳統遺產最怕係乜？最怕就係後繼無人，今日唔出手保一保，明日真係怕寶變草。

非物質文化遺產就好似女人咁，開講有話，女人唔補好易老，計功夫茶話齋，傳統唔保好易冇。所以話啫，民政事務局如果唔想做一個漠視傳統遺產嘅敗家仔，唔該急起直追，切切實實做好保育工作！